周日歐洲球壇有唔少紀錄誕生，西甲方面，皇家馬德里前鋒加里夫巴利破紀錄嘞；周日場聯賽壓軸戰，皇馬4:0擊敗西維爾，「BBC組合」賓施馬、基斯坦奴朗拿度同巴利各建一功，謝斯洛迪古斯就埋齋，巴利西甲上陣76場攻入43球，打破咗前英格蘭射手連尼加所保持嘅英國球員西甲入球紀錄。皇馬不經不覺五連勝，教練施丹希望保持強勢，下場國家打吡可以作客擊敗巴塞隆拿。
美斯省暈女球迷要道歉
巴塞同日作客維拉利爾，領先兩球下被逼和2:2，不過仲領先皇馬10分，冠軍仲好穩，比賽初段美斯勁射斜出，省中一位女球迷，女球迷當堂暈得一陣陣，要在場醫護人員協助，美斯都唔好意思同佢say sorry。
但又唔係每個英國人喺西甲都咁順，華倫西亞主場0:2輸俾切爾達後，已經跌到13位，距離護級線多六分咁大把，主場球迷就對英格蘭教練加利尼維利極不滿，完場後對加利佬嘅噓聲長達10幾分鐘，仲有好多球迷揮白毛巾㖭。