【看淡前景】
叱咤舖壇近40年的「舖王波叔」鄧成波，是物業投資界老行尊，工商舖物業遍佈全港，市值逾150億元。近年又涉足酒樓生意及收購上市公司，身家隨時過千億。其孻仔鄧耀昇跟隨父親學習投資多年，認為舖市尚有15%跌幅。
鄧耀昇指出，核心區不少舖位「十室九空」，業主已開始接受舖位租予散貨場，「叫做有人幫手交下管理費、差餉，開住燈做生意，有長租客嚟睇舖都唔會吉咗喺度」。但始終人民幣貶值加上打貪，令相關行業如鐘錶珠寶、化妝品都「冇乜運行」。
裁員凍薪打擊消費
一線舖位今年都要接受現實，今年最後三季料舖租會再有15%跌幅，裁員、凍薪潮準備開始，股市未反彈，「到五窮六絕嗰時，大家都唔會消費」，舖市難有利好消息刺激。
「因為嚟緊加息在即，如果呢一刻平咗幾十萬租出去，一到加息，個舖隨時唔係每個月少收嗰幾十萬租咁簡單，而係個舖賬面貶值咗過億」。現時知道有個別丟空一段時間的舖位業主，都嘗試自己用個舖做生意，例如開餐廳，未必個個都肯平租出去。
2011年再次自立門戶的鄧耀昇，創立婚禮統籌公司拉斐特。兩年前，波叔收購東海，由鄧耀昇擔任主席，負責整個飲食集團。去年他聯同波叔收購上市公司易通訊（8031），鄧耀昇更擔任上市公司CEO。對於舖位投資，近年投資策略已轉為全幢物業或大樓面舖位，「喺尖沙嘴買一個舖要幾億，但其他地方已經買到一幢物業」。由於前幾年太多人買舖，價錢已經不合理，所以才不買舖。但近一年睇過不少地舖，最近再更加留意，睇機會入市。