特首夫人梁唐青儀同肥媽老友鬼鬼，對飲食都特別有研究，佢喺出席「全城有機日」時，就話自己平日都盡量買有機食材，亦有自己種菜即摘即食，仲話各位市民可以返屋企試吓！嗱嗱嗱梁太買嗰啲一定唔係消委會發現嘅假有機菜嚟，梁特咁愛種植，佢哋自己種嗰啲亦絕對有機（好似係）；為咗令小巿民可以有樣學樣，我哋就特別請教咗同樣熱愛自耕自足嘅廚師徐蒝（Margaret）分享吓有機種植嘅心得。
Margaret自己擁有幾塊有機菜田，每年都要重新認證才可證明種出來的蔬菜是有機。現時香港有兩個認證系統，一是香港有機認證中心（ HKOCC ），二是香港有機資源中心（ HKORC ），由種植土壤、水源、肥料以致環境都要經過審核才可通過。如果想在家種有機菜就要注意以下幾點：
1.土壤：需要買有機泥，由零開始最穩陣，買已經發芽或有苗的蔬菜，它的前期生長無從追究，有受污染的可能。
2.水源：要確保水源乾淨，避免含重金屬（香港水「鉛」咁充足，最好過濾一下啦。）
3.肥料：唔好以為自己啲大小二便發酵下就係有機肥，其實你食埋食埋好多毒嘢唔會察覺，倒咗落去種菜，啲菜會同你一樣咁毒；至於自家酵素呢？係好嘅，不過都係要追源，睇下係咪本身有機先得。
4.環境：最好係通風有陽光嘅地方，唔好似為整個溫室就好warm，溫室嘅密室環境唔算係有機。
種乜好？
車厘茄：慳位、15厘米左右的小盆就可種一棵，但要有超過半日陽光才易結果。
辣椒：越少肥料越好，幾個月有得食。
生菜：容易生長、快大，最緊要泥土夠深給菜長根，選長形盆種一排更好，一至兩個月就有收成。
香港人屋企咁細，種一兩盆怡情算啦，唔好諗住可以餵飽自己呀。
記者：容慧心
