毛里裘斯籍騎師田泰安，剛戰夥柏「東方快車」挑戰打吡無功，隻馬輸蝕進度都冇辦法，但田泰安嘅整體運氣其實唔錯，今季個人已取35win甚佳外，本周三(23日)夜賽更是行正大運，點解呢？
安仔全晚只有5匹座騎唔算多，不過啲馬有分量之餘，「多多勁驥」、「馬上發財」及「光芒再現」三匹新勝當起分子，更悉數抽1檔，真係如虎添翼。
其中苗廐「馬上發財」今仗爭一班1800米跑馬地銀瓶，隻馬至今8戰谷草得3冠2亞2季，準到冇朋友，呢日由田泰安親操，出試前後苗禮德都傍到田泰安實一實，擺明好緊張隻馬嘅進度，今次錦標當前，加上1檔，絕對不會留手。
至於「多多勁驥」及「光芒再現」都係繼續出戰贏馬之谷草1200米，「多多勁驥」上場大勝近4馬位，反映隻馬正在不斷進步中，今仗升上四班亦絕不吃虧。而「光芒再現」4歲馬只跑過7次，潛力肯定未到盡頭，田泰安淨係上述三匹新勝座騎，已足以令佢勝出騎師王。