宋慧喬同宋仲基喺紐約食飯，令雙宋粉絲無限興奮，而喬妹自出道以來，其實只公開承認有兩個男朋友，分別係李秉憲同玄彬，而巧合地，二人都係因為拍劇而撻着。
喬妹同李秉憲因03年合演韓劇《All In真愛賭注》而戲假情真，之後更高調前往台灣宣傳，可惜戀情翌年玩完，憲哥曾表示分手原因係結婚觀唔同，而憲哥現已成家立室，有靚老婆李敏貞同囝囝。
另一個獲得喬妹賜予男友名份嘅係玄彬，二人因合演08年韓劇《戀愛夢工場》而咀出愛火，翌年8月公開戀情。不過2011年3月玄彬入伍翌日卻宣佈掟煲，原因係佢哋各自忙於拍戲同海外活動，關係自然疏遠，同時因外界過份關注，又屢傳佢哋分手，令佢哋太大壓力。此外，喬妹亦曾與《浪漫滿屋》拍檔Rain傳出緋聞，仲要傳足多時，而Rain現已有穩定女友金泰希。
除咗宋慧喬同合作拍檔戲假情真有前科，宋仲基嘅緋聞都唔少。宋仲基喺圈中一向好受女藝人歡迎，女團AOA成員雪炫、SISTAR成員寶拉、女歌手Younha等人亦曾公開表示好冧宋仲基，而宋仲基嘅緋聞女友亦未停過。
宋仲基同文彩媛喺2012年因合作韓劇《善良的男人》而傳出戀情，當時二人被影到於後台等埋位時表現親暱，宋仲基會不避嫌地摸文彩媛嘅頭同臉，十足十真戀人一樣。