青年事務委員會主席劉鳴煒之前話喎，年輕人要買樓，就要睇吓肯唔肯睇少啲戲、去少啲日本旅行，查實時下後生仔就最識「窮遊」見識大世界。21歲正籌組新黨嘅前學民思潮發言人黎汶洛Oscar，都係其中之一。
咪睇Oscar成個文青樣，佢話由細到大都好鍾意通山走，親親大自然！佢亦鍾意去旅行，比較番佢細細個外遊相片，除咗高咗，其實個樣冇乜變，小五時去過泰國芭堤雅水中漫步；中一則去過澳洲攬樹熊！𠵱家係社會工作學系三年級生嘅Oscar話：「啲人成日覺得，去旅行要好有錢先去到，其實千幾二千蚊，已經可以喺東南亞地區玩吓、見識吓。」
自言好少打機嘅佢強調，若要減壓，與其對住螢幕、不如出外識吓新朋友，又或外遊同當地人傾吓偈，佢話最能感受當地文化嘅其中一個好去處，肯定係行街市。