禮拜三(23日)谷草賽事用C跑道，近幾次谷草C欄都係嚴重利放，以最近2月24日為例，當晚九匹頭馬，全部守前五位入直路建功，其中「海之濤」、「多多勁驥」、「金碧旺旺」、「愛寶」及「包裝騎士」更加係一放到底贏馬，加上預計周三有雨跑淋地，估計前領馬只會如虎添翼，買Win要向具前速之馬匹埋手。
今戰列陣馬中，第三場「金碧旺旺」及第五場「多多勁驥」上仗正是於2月24日谷草C欄快放贏馬，等番同一移欄再跑，有機會再下一城。
另外，第二場「兄弟醒」係全場唯一曾於谷草C欄上名之參戰馬，本身跑法主動，憑跑道形勢之助，可坐位望贏。