【尋找首爾的香港】捱過星期一，只係星期二，起身嗰陣又彈出「射波」念頭？如果返工係你嘅興趣，人生會有幾快樂？這些機會...已經屬於香港人阿男，一個出走韓國，熱愛滑雪嘅滑雪教練，仲係一間一天遊公司嘅老闆！
記者：鄒倩婷 攝影：陳家文、李錦鏵、張宗光
正所謂「吃得苦中苦，方為人上人」，居韓十四年、三十多歲嘅阿男有今日嘅成就，係捱過人在異鄉之苦。佢為學韓文、為生活體驗，用最平嘅價錢住過當地最落後嘅劏房，喺冬天零下十幾度，捱凍用水龍頭沖涼；為生活費打散工，做Sales、做導遊，最差時月薪只有港幣六千幾蚊。阿男話當時有諗過返香港，「同自己講都唔知為乜，點解咁辛苦過嚟捱呢？」但佢又諗深一層，一日未賺到經驗，未達成目標，走咗就乜都無，點捱最終都要堅持！
阿男熱愛運動，善於滑雪，最初只為興趣，從來冇諗過有日會做到滑雪教練。直至五年前，一位開民宿嘅朋友，邀請佢為民宿客人教滑雪，先第一次感受到以興趣為職業嘅快樂！食住近年韓流襲港個勢，五年間已經教過幾千個學生，正所謂「教學相長」，阿男話喺學生身上學到好重要嘅做人態度。
原來阿男初初會以學生嘅身形，高矮肥瘦嚟標籤佢哋嘅學習能力，「我見過有半邊身唔係好用到力嘅客，心諗咁樣都嚟參加滑雪，唔得架喎，佢跌倒都企唔返起身，點知佢堅持滑，堅持唔跌，真係由雪山頂滑到落嚟，呢份堅持真係好過嗰啲玩一次就放棄，四肢健全嘅人！」自此，阿男就警惕自己，無論咩學生都要一視同仁咁教！
兩年前，阿男儲到穩定客源，就創辦一天遊公司HeHa Seoul，除了冬天有滑雪教學團，其餘三季都帶團到郊外玩，行程全部由阿男自己寫，一手一腳安排。佢話喺韓國開投資公司好麻煩，政府政策成日變，最低投資金額年年都唔同，而佢當時要預備兩億韓圜，大約140萬港幣，「匯過來韓國呢邊等政府審批，之後過入韓國戶口，呢個戶口嘅錢我唔可以亂用，只係畀公司營運，因為政府要確保我至少可以蝕一段時間。」
阿男話創業兩年就回本，目前月賺五至六萬港元，已經唔打算回港，「好多客話我揀啱咗，離開香港，唔好返去喇，咁兩個地方揀，我都會揀留喺韓國。」佢話兩地相比，韓國嘅空氣和居住環境都好得多，至少有公園、有山、有郊外嘅地方，畀人喺工作以外嘅日子放輕鬆，放慢腳步。而住嘅地方唔止四堵牆，係十幾堵牆，「唔係話我屋企有幾大，只係好普遍，屋係咁大o架，租金仲相對唔使香港嘅一半，至少我安居，跟住先去樂業！」難道安居、樂業、夢想、創業......真是要出走才找到？