【科健籽：食養東西】
我啲烏髮，如同我的青春小鳥一去不返，嗚呀，返來呀。常言道：諗嘢多，白髮多。如果有日腦力透支，一覺醒來，會唔會成頭白髮？中醫師許懿清就話冇乜可能，咁抆一條係咪生三條？一條條白髮在頭上仍是揮之不去，煩惱絲果然不負煩惱之名。要踢走衰老象徵，一於三管齊下。
逐漸變白，得；立即變白，唔得。除非極罕見疾病及遺傳病，否則頭髮只會慢慢變白。許醫師說：「一夜白頭聽就聽得多，但現實中我未見過，我真係未見過。頭髮變白係因為黑色素流失，係長期過程，唔可能幾小時或幾十個鐘完成。」她又提到白頭髮是一點點的從毛囊長出，髮根白色，髮尾還是黑色。「正常人頭髮一個月生1.25厘米左右，所以唔會一夜白頭，而且頭髮沒血管、神經，實際上是死物，不會因任何身體變化而變白。」
好，疑團解開。發生極端情況的機會微乎其微，那麼就着手解決一根又一根礙眼的白髮。可能你都聽過「髮為血之餘」呢句話，氣血唔好，頭髮都唔會靚。許醫師說：「頭髮也是肝腎之精華，要預防白髮，需要補血強肝腎的膳食。」
剛才提到黑髮唔會瞬間變白，咁白髮可以秒速自然變黑，這些機會當然也不屬於我們的。「不過個毛囊出過白頭髮，自然脫落後，又唔一定永遠只生白髮。只要體質改善，復原製造黑色素的機制，同一毛囊仍可以生出黑髮或深色頭髮。」拔掉可以嗎?會再生白髮嗎?真相是硬拔頭髮對毛囊破壞力驚人，有可能扼殺頭髮生長，所以即使條白髮篤眼篤鼻，都要以剪代替拔呀！
捱夜多傷肝腎 創作人早生白髮
有說經常用腦的人，未到中年可能頭已半白，咁創作人士咪屬高危？「思傷脾，影響血氣生化之源，做創作職業的易耗損腎精，頭髮易早白。」她補充，壓力太大，煩惱焦慮者傷脾臟，令氣血不暢；捱夜導致陰虛，傷肝腎，白髮也自然長出來。
醫師建議用女貞子、製何首烏、黑豆等煮糖水，藥材健脾益肝補腎，烏髮效果顯著。糖水唔可以日日飲，她提議多吃黑芝麻。「它是滋補聖品。黑色食材養腎，絕對推薦天天吃10克。」她又教以青黛粉自製天然烏髮素及按摩頭皮的技巧，幾路夾擊，白髮從此冇得留低。
食療健脾補腎
【女貞子製何首烏糖水】
材料：女貞子、製何首烏各三錢，黑豆、桑寄生、有衣核桃肉各一両，陳皮一小塊，片糖一塊
方法：全部材料加2.8公升水以大火煮滾後，改文火煮一小時，隔渣取茶，加一塊片糖煮溶即成。
功效：健脾益肝補腎，多服有效減慢白髮生長及預防早生白髮，一周服兩至三次。
洗頭＋按摩毛囊
【天然茶籽粉清潔液】
材料：一両黃豆，茶籽粉50克
方法：用一公升水浸泡黃豆六小時，去掉黃豆，把水加茶籽粉煮滾，再以文火煮十分鐘，隔渣即成。
用法：清潔頭髮，同時按摩頭皮髮囊。
功效：茶籽粉富天然茶皂素，有效殺菌、消炎，用以取代堵塞毛囊的化學洗髮水，養護毛囊。
洗頭＋按摩毛囊
【天然烏髮素】
材料：原味乳酪50至80克，雞蛋一至兩隻（視乎頭髮長短），維他命E油30毫升，青黛粉3克
方法：發雞蛋，拌勻乳酪，加入維他命E油及青黛粉，攪拌至完全混合。
用法：輕柔按擦濕髮髮根十分鐘，用「天然茶籽粉清潔液」洗掉。注意要即做即用。
記者：葉青霞
攝影：黃子偉、楊錦文
編輯：李寶筠
美術：利英豪