昨日談及對電視直播政治節目而言，「粗鄙叫座」，或有不少衞道之士反感，但睇電視之人，未必人人係理論理性派，易受情緒影響，譬如香港選舉論壇，黃成智講說話好悶，能吸引觀眾吖，還是陳偉業嘅呼喝動作夠過癮？直播黃成智談話會趕電視觀眾轉台，播梁國雄粗獷表演，收視率會高好多喎。
唔好話香港觀眾低水平，美國人咪又係一樣，美國專欄作家幾乎冇一個唔鬧特朗普，紐約時報、華盛頓郵報、華爾街日報三大報章，美國知識分子，上流社會，財金界大人物必讀嘅報紙，對特朗普深惡痛絕，一致對佢口誅筆伐，偏偏美國普通人（中國術語：老百姓）就係咁投特朗普一票，令佢成為共和黨總統候選人嘅大熱門，氣勢日盛，電視有特朗普出鏡鬧人（佢乜都鬧得，女人、墨西哥人、伊斯蘭教，百無禁忌），就有收視保證，反而溫文有禮，辯論時願意講吓道理及政策嘅杰布殊就輸到落荒而逃，卡西奇州長其實唔錯，亦遙遙墮後。
據講投票支持特朗普嘅，多是基層低收入白色藍領工人及因為「工程外判」（outsourcing）而失去相對高薪職位嘅製造業工人，包括各不同膚色族裔群；年薪十萬美元以上嘅選民，壓倒性反對特朗普，美國政治術語Politics is always local，又得到一個證明。政客講甚麼自由貿易、世界平衡，氣候轉變，反恐保國家安全等等，基層選民唔識聽，完全唔理。聽到特朗普講完又講，講咗幾百次嘅Bring the jobs back; Make America great again（冇內容之空洞口號），佢嘅支持者就會拳頭搥胸，一齊大嗌USA，USA，呢啲就係本土主義，民族主義。美國收視率最高之有線電視霍士（Fox News）最初為咗收視率，大捧特朗普，一位主持人Hannity更係佢嘅擦鞋仔，經常訪問佢，奉迎佢，霍士係共和黨選舉辯論嘅主要平台，每次收視率有特朗普上陣，廣告收益就好肥仔，正是互相利用，但特朗普成為大紅人之後，就反轉豬肚，對講少佢幾句好話嘅女主持人姬莉好不滿，發脾氣，又覺得自己贏梗，拒絕出席最後一場於3月21日舉行嘅辯論會，剩番告魯士對卡西奇，鬼有人睇咩，卡西奇好醒目，即刻宣佈佢都退出辯論，於是霍士見財化水，氣頂之餘，對特朗普再唔客氣，向佢開火了。