【文化籽：影人影事】
相信人人都有一顆迷戀超級英雄的心，每當被人欺負或是徬惶無助之際，誰沒想過超級英雄忽然現身，向你伸出援手？《蝙蝠俠對超人：正義曙光》即將上映， god vs man, day vs night，突把粉絲分成兩大陣營，若然跳出銀幕，兩大英雄生於這個年代，你會支持哪一方？自己偶像自己撐，記者邀得蝙蝠俠迷鄭志浩（Zero）和超人迷吳文瀚（網名ChaRles）先來一場牙骹戰，睇包裝講實力，論盡兩名人氣角色的軟硬實力！
兩位死忠到底有多瘋狂？1991年開始看英雄漫畫的ChaRles，自言愛DC多於Marvel，深入鑽研每個系列、情節倒背如流。從事設計工作的他，不但抽空為本地動漫雜誌寫了10年有關超級英雄漫畫的專欄，又獨自經營網站及facebook專頁「超級英雄談」。但跟一般粉絲不同的是，ChaRles不太迷戀figure，反而喜歡翻參考書。
至於蝙蝠俠迷Zero，10年前開始看漫畫，特意租用工廈單位擺放偶像珍藏，game、lego、漫畫、參考書，還有不同大小、造型、材質的figure。他更會自製服裝cosplay成蝙蝠俠，頭套、盔甲、飛鏢全都極盡細緻之能事，笑言所有珍藏、服裝加起來「五、六萬一定走唔甩」。Zero每次「變身」外出，都會引來大量市民圍觀、討合照，採訪當日，人潮差點把我逼開。正職是體操教練的他，雖然一大早便要上班，但為了心愛的蝙蝠俠，在與ChaRles對談前一晚，他還努力不懈，查找參考書至凌晨。問他可否分享一些蝙蝠俠的冷知識，最後竟然羅列了33項，足足印了四頁紙，好認真！
C：ChaRles Z：Zero
力量 超人夠屈機
C
：
超人係外星人，吸收大陽能之後會有各種超能力，例如識飛、透視、雙眼可以發射熱力、任何子彈都射唔穿等，基本上係屈機嘅。
Z
：
蝙蝠俠只係凡人，但有驚人嘅意志，兼受過各種忍術、武術訓練，而且佢好有錢，好肯投資喺科技上面，加埋人脈，例如James Gordon局長、唔同年代嘅羅賓都會幫佢。
追女Package 超人都係地主？！
記
：
今次電影鋪排咗神奇女俠出場，唔少人希望有感情線，雖然係幻想居多，但兩人同時追求神奇女俠，邊個嘅package會好啲呢？
Z
：
蝙蝠俠佢大把錢，有車有樓，又識享受……
C
：
嗱嗱嗱，超人老家都有塊田，雖然𠵱家冇乜嘢種到出嚟，但以超人嘅力量應該可以種到好多嘢。
Z
：
但齋計啲地，超人係咪多啲？
C
：
呢個要check番，但啲地唔可以用嚟起樓，只可以做農田。不過超人純樸、好仔、顧家，我估佢應該識煮兩味，而且有正面思想，所以會係一個家庭嘅正能量。
Z
：
蝙蝠俠有佢嘅黑暗面，鍾意獨來獨往，遇到解決唔到嘅問題都會死頂，可能激發到Wonder Woman嘅母性而去幫佢。
C
：
嘩，你出到呢招？
女人緣 蝙蝠俠原來有個仔
C
：
超人雖然專一但好有女人緣，佢鄉下有個青梅竹馬叫Lana Lang，大學嗰陣有條美人魚叫Lori Lemaris，嚟到大城市有個女記者叫Lois Lane，佢身邊嘅女人其實好多。
Z
：
蝙蝠俠女人緣麻麻，但每日都有人自動送上門，哈哈。花花公子嘅個性只係掩飾，扮成二世祖咁樣，夜晚先可以做佢嘅任務。
C
：
蝙蝠俠大個咗，要成家立室、傳宗接代啦！
Z
：
其實佢有個仔，就係同忍者大師女兒一夜情的愛情結晶品。
顏值 齊齊收埋底褲
C
：
講到型，梗係永遠都梳all back，點樣飛，髮型都唔亂嘅超人啦！我知你一定會笑佢條紅底褲，所以我講先啦，過年好意頭呀！
Z
：
着喺外面特別好意頭？
C
：
當然啦！
Z
：
但喺《超人：鋼鐵英雄》嗰陣，超人已經冇咗條紅色底褲。
C
：
咁蝙蝠俠都收起咗佢條黑色底褲啦！
冷知識 蝙蝠俠識北斗之拳？！
Z
：
蝙蝠俠識得世界上127種武術，包括忍術、北斗之拳，仲有中國人嘅點穴大法。佢識得傳統武術但又好新潮，不但有上網嘅習慣，原來仲有網名，叫JonDoe297。
C
：
好多人都知道九十年代發生過「超人之死」，但嗰次超人唔算係真死。佢平時會將能量儲存喺身體裏面，用盡嗰陣就會陷入昏迷、假死狀態，只要有陽光照到就可以復原。
《蝙蝠俠對超人：正義曙光》聯乘又一城展覽
開放日期：即日至4月10日
場地提供：又一城
鬥足70年 敵人變摯友
《蝙蝠俠對超人：正義曙光》的劇本參照了1986年出版、蝙蝠俠漫畫《The Dark Knight Returns》系列中的最後一部，開店主售漫畫及周邊商品23年的「美漫達人」關志成（Jerome）指，當年這套漫畫讓美漫起死回生，「嗰時美漫正值低潮，DC搵嚟Frank Miller構思呢個系列，結果不負眾望，真係拯救咗當時嘅漫畫市場。」何以成為經典？「呢個系列嘅蝙蝠俠，性格比以前更複雜、陰沉，出手更重，影響咗之後嘅角色設定，將一個新嘅蝙蝠俠呈現出嚟。」Jerome續說，此舉讓美漫更貼合成年人口味，蝙蝠俠的黑暗形象亦有深遠影響，間接令Marvel創造了Daredevil這個角色。
看了30年漫畫的Jerome笑說，超人及蝙蝠俠誕生至今的70多年間，已鬥過不下數十次，「當中互有輸贏，不過統計結果幾令人意外，就係蝙蝠俠贏得多啲。」外星人都鬥不過凡人？「其實係性格問題，超人係正義代表，只會光明正大同你打，但蝙蝠俠本身係普通人，次次都出古惑，所以超人成日蝕底。」電影中，蝙蝠俠穿上銀色盔甲，如果跟足漫畫，手套將是由超人最害怕的氪氣石製造，果然古惑！（溫馨提示：以下將有劇透！）
漫畫中，蝙蝠俠雖然贏了，但為了轉為地下行動而裝死，令超人十分傷心，二人是敵是友？「佢哋係摯友，雖然觀點、角度唔同，但保護地球嘅目的都一樣。」電影當中兩大英雄初次相遇，新移民外星人惹來蝙蝠俠的不信任，「不打不相識，然後建立友誼。」
Clark's Comics
銅鑼灣中心商場地庫B7號舖
部份圖片由受訪者提供
記者：陳穎欣
攝影：鄧鴻欣
編輯：陳國棟
美術：吳子豪