人在危急時，往往需要朋友幫助。據路透社報道，舊年中國股市暴跌時候，人民銀行曾經詢問美國聯儲局當年點樣應對1987年「黑色星期一」股災。
報道指，人行喺舊年7月27日發出一封標題為「如蒙緊急協助，將不勝感謝！」嘅電子郵件畀美國聯儲局。據講，呢封電郵除咗提到內地股市一日暴跌8.5%，仲話：「我的行長希望借鑑你們的經驗。」
聯儲局收到電郵後，幾小時後就向人行提供大量聯儲局喺1987年點樣對付股災嘅文件。不過，唔好以為呢堆文件係驚天秘密，路透社指，呢堆文件一早已經上載喺聯儲局官方網站。
話番轉頭，中國舊年「暴力救市」越救越衰，唔通就係因為有人參考咗呢堆文件？可惜，人行與聯儲局對呢個報道都係no comment。