吳得掂蹺腿在局長座駕內篤手機，懶理中學生在車外抗議，闊佬懶接請願信。這張照片高速瘋傳，連外國朋友都覺得香港當官的，超然於首富與政要，錫身矜貴，冠絕全球。網友乘機追問吳局長幾時會落台，港府會否海外獵頭，網友卧虎藏龍，每個月睇三十本乘N倍的書是easy job。
局長篤手機，可以抵賴是在超時工作，大家咪唔忿氣！篤機上網，正在尋找他鄉，對，是福建大學以外的其他省份的名牌大學，打算一籃子推出任大學生揀。頭炮是FU，比粗口更難聽啊。俾後生仔再揀BCD餐好了，北京清華復旦雖然今日未有着落，局長篤吓篤吓，將來必有佳音。而善心網民推斷局長忙着篤機而不是篤灰，是book定日本外訪行程，去「好靚！好正！」的東瀛探路，睇吓早稻田和東京大學俾唔俾面，撥些少學額益吓香港學生。喔，乜話，一帶一路唔包括日本？這個嘛，執生補鑊，將東京變東莞！中國風險等同香港機會，東莞前景，真係見到！李克強眼中，肯定好過被同胞爆買的東京！