適逢2016巴西里約奧運年，今年主辦單位喺佈置同節目設計都加入森巴特色，為奧運造勢。場內外都有森巴女郎同嘉賓影相（圖），配合森巴舞同音樂，唔講以為提早去咗巴西呀！
花絮︰黃鎮廷遊飛機河
啱啱打完科威特公開賽嘅港乒一哥黃鎮廷（圖），噚日專程坐10個鐘飛機返港，佢話最佳運動組合獎同杜凱琹兩位本地球手孖住攞別具意義，就算即刻坐九個鐘機返卡塔爾都值得！
花絮︰奧運制服似旗袍
頒獎禮場內首次展出今年里約奧運港隊代表嘅制服（圖），整體設計較中國式，衫領部份有啲似旗袍嘅小企領，顏色就以紅、白為主；同以往唔同嘅係，男、女都冇再用領呔。
