【本報訊】深水埗明哥向區內有需要人士派發免費飯盒多年，除了一群基層市民受惠外，善行亦感染了其他食肆東主效法，自發向區內基層人士派飯。有食肆東主表示賺錢多少並不重要，「最緊要知足常樂」。
「最緊要知足常樂」
明哥不時都會收到善心者捐贈的食物，其飯店未必能全數接收，所以他便會分發給區內其他小店，「希望可以減低佢哋嘅成本，大家都賣平啲囉」。在北河點心茶餐廳一街之隔開設小食店的王小姐指，與明哥相識數十年，除了接收其食物之外，更延續明哥的善心，不時向區內有需要人士派發豆腐花、碗仔翅等小食，過年亦會向露宿者派飯，「唔係話賺多賺少，最緊要知足常樂，憑良心做人，過得去就得」。
明哥兩間食肆的三餸飯及燒味飯，從2011年至今仍維持低價22元。他坦言收支僅可維持平衡，而新舖食物售價可能會有所增加，但強調「唔會追住通脹，加1蚊平衡到就淨係加1蚊」。王小姐認為，深水埗區內的街坊人情味濃厚，「大家應該互相幫忙，啲嘢賣平啲，咁廣大群眾受惠，咪大家都開心囉」。
街坊張先生光顧明哥食肆多年，指飯店是區內「最抵最平」，又讚明哥常做好事。他認為今次加租幅度高，聲言「如果可以簽名反對（加租），我第一個簽」。
64歲的明哥每日工作逾12小時，年紀漸大的他希望盡快找到「接班人」，將分享行動一直薪火相傳下去，「都係嗰句，我希望香港有一日唔再需要明哥，咁個社會同市民就會過得好啲」。
■記者趙雅婷