英超一哥李斯特城前晚作客水晶宮，憑馬列斯入波贏1:0，家陣31戰得66分，比周日先比賽嘅熱刺多成八分，好有機會創歷史首次做英超盟主。雖然冠軍在望，不過領隊雲尼亞里仲好低調，話佢哋家陣只係確保出線下屆歐霸盃，要贏多兩場先肯定攞到歐聯入場券，對奪冠就隻字不提：「我哋仲有七場波，對我哋嚟講一啲都唔容易。我哋係李城，唔係曼聯、曼城或車路士，如果佢哋領先五或八分就大局已定，但我哋唔係十拿九穩。」