會德豐地產呢排準備緊賣何文田嘅新盤，雖然市道唔係幾好，但發展商高層同各方友好，連續兩日喺示範單位嘅推盤活動開香檳，預祝紅盤高開，銷情暢旺。不過睇真啲，就唔係人人都拎住杯香檳。喺地產界德高望重、人稱「堅叔」嘅會德豐地產主席梁志堅，只係以水代香檳。
堅叔今年77歲，年紀都唔細，大家成日話飲酒傷身，佢一啖都唔飲，應該十分注重養生與身體健康。佢亦十分精靈，傳媒問佢關於地產嘅問題，佢思路清晰，講得不知幾有條理。
好似講開有人話幾間發展商一齊推盤會唔會係互相踐踏，堅叔就話，「何文田幾個盤一齊推出，發展商之間各有各做，咁樣市場氣氛仲好啲，而且畀買家多啲選擇，係一種良性競爭」。佢呢種避重就輕、唔會得罪行家嘅語言藝術，顯示佢寶刀未老。