「中國梅鐸」黎瑞剛似乎好有心打造美克國際（953）呢間上市公司，佢今年初成功入主之後，隨即搵來TVB（511）製作資源部總監樂易玲幫手做執行董事，跟手又建議將公司易名為「邵氏兄弟控股」。聞說，佢仲一直周圍物色緊人做公司行政總裁（CEO）㖭呀。
黎瑞剛入主美克都幾經波折，美克原先發行大量新股，引入黎瑞剛、有「殼王」之稱嘅陳國強同騰訊（700），後尾港交所（388）say no，黎瑞剛改為自己買入三成股權，正式入主。
佢雖然搵來樂易玲做執董，但樂易玲喺呢度只係義工，長遠而言，黎瑞剛都係要正正經經搵番個人喺度揸旗先得嘅。
聞說，公司之前都見過唔少人，不過仍然未落實，咁都啱嘅，幫一間新公司打工，最重要知道老闆嘅最終目的，摸唔清楚好難做到落去喎。