香港桌壇「四眼妹」吳安儀，可望憑「雙料世界冠軍」，喺今晚會展舉行嘅香港傑出運動員選舉中，打破單車壟斷局面，首奪「星中之星」大獎。話平常心面對嘅安儀，覺得舊年係香港體壇豐收一年，攞獎順其自然喎。
勢破單車壟斷局面
「星中之星」係獲選八名香港傑出運動員中，票數最多一位，根據佔20%嘅公眾投票（另20%為傳媒投票，60%由評審委員會成員投票），25歲嘅安儀名列前茅，第二至第五順序係單車李慧詩（Sarah）、長跑姚潔貞、游泳歐鎧淳同保齡胡兆康。由2006年開始至今共九屆「星中之星」，其中八屆都係由單車選手贏得（見附表），又睇吓可唔可以繼蘇樺偉後，再有其他運動員打破壟斷局面。
「星中之星」另一熱門胡兆康，舊年首奪世界盃金牌，加上克服癌病嘅堅毅意志，籌委會主席劉掌珠早前講過，如果出現相同票數，唔排除有兩個「星中之星」獎。究竟花落誰家？今晚七點自有分曉，屆時仲有最佳運動隊伍公佈㖭，因為過去五屆得主男子七欖今年冇提名，喺世盃外有出色表現嘅港足，有機會成為最佳隊伍得主。
