勇士上周六就會作客馬刺，上演今季NBA常規賽最強對最強之戰，雖然「聯盟一哥」勇士背靠背，但上周五作客小馬一樣冇留手，「浪花兄弟」夾埋轟入70分，射入39分嘅K湯遜（Klay Thompson）三分波15射10中，職業生涯累積超過1,000球三分，成為聯盟第二年輕突破呢個紀錄嘅球員，邊個最快？咪就係佢隊友、今場射入31分嘅史堤芬居里（Stephen Curry）囉。
不過勇士正選中鋒保格（Andrew Bogut）就只打咗九分鐘就因拉傷左大腿缺陣，好大機會對唔到馬刺，今次聯盟排第二嘅馬刺仲唔趁機贏番勇士一次？（now635台今日8:30am直播）