AlphaGo大勝李世乭（圖），大家最擔心係電腦勁過人腦，話怕有日人類會被電腦統治，呢啲咁荷李活電影嘅橋段，我唔擔心，因為我連圍棋都未正式玩過，一個包尾嘅人係唔會對邊個跑第一有興趣嘅。我淨係知部電腦就算贏咗，都唔會有咩興奮嘅感覺啩。
話說日本有本漫畫《棋魂》，係圍棋版嘅《足球小將》，都追睇咗十幾廿集，最後之所以放棄，皆因唔明當中竅妙，人識笑你唔識笑，就如另一半一日唔知offside搞邊科，佢都唔會真心想睇波。其實有些少好奇會唔會有媒體食住個勢教吓大家捉圍棋呢，真係逐步教大家玩嗰款。
其實我係有用手機捉棋嘅，不過係中國象棋，網上對戰嗰隻！由於世界上勁人太多，加上我細個只係鍾意玩盲棋，所以基本功超弱，上網捉棋原本就係自己攞嚟衰，但我鍾意喎。
我之前曾經玩咗一輪鋤大dee，話晒都係好幾屆冇認受性嘅dee王，所以都會online玩吓諗住keep住個狀態，不過玩咗一年半載後，我發現咗騙徒嘅策略，就係開頭鋪鋪畀靚牌你，等你以為自己好勁嘅時候，就一鋪焗你俾人炒鑊甘，唔順氣，畀錢啦！係，網上所有同賭博有關嘅遊戲，目標都係你啲錢，正如女人話齋，所有男人都係冇良心一樣，偏偏以上兩種講法，男士們都唔認同，個個都覺得自己必勝同專一。
曾經滄海之後，我發現捉棋有益身心，首先因為我10鋪先贏到一鋪，所以鋪鋪都好似跟對手學嘢咁，嘩乜可以咁樣抽車嘅？又可以咁樣飛公㗎？大開眼界之餘有時輸咗都笑得出，真嘅，因為學到嘢兼冇人笑你，唔怕瘀。
玩象棋仲有個好處，就係練埋品德，因為捉棋係有個悔棋嘅功能，只要對手同意你就可以再行過，放人一馬嘅行為幾兄友弟恭呢，啱晒我呢啲新牌仔啦。只可惜每次我要求悔棋，10個有九個對手都唔肯！做咩箒，輸贏有咁緊要咩？所以輸家有樣嘢係叻過贏家，就係唔怕輸！
文：KEYMAN