53歲製衣商人劉子健(Ashok Bharwani，簡稱Ash)，是香港土生土長的印度人，他父親早在1949年19歲時來港，替洋行做生意並且落地生根。Ash中學入讀聖若瑟書院，求學時期所有朋友都是香港人，他說：「我啲廣東話喺學校pick up，我冇讀過中文，我喺街學認字，買報紙、睇吓書，然後問朋友，一個一個字認返嚟。」
Ash和太太Priya結婚25年，劉太Priya說：「我識講中文，但唔識睇唔識寫，冇我老公咁叻，正因為咁，我要確保兩個女識睇識寫。」劉氏夫婦很重視女兒的中文水平，打從大女兒4歲起，便以中文跟她溝通，挑選學校時，亦選擇一間有良好普通話基礎的。Priya：「我哋睇電視都會睇翡翠台，睇劇集，喺屋企同喺街都用英文或者廣東話溝通。我兩個女係第三代(印度港人)，當香港係屋企。」
這對「印度港人」夫婦，視香港為家。對於印度男人專制、保守、大男人的說法，Priya有以下體會：「印度都好似其他國家咁，有唔同嘅男人，但我老公思想好開放、好Modern，唔係大男人。」
Ash：「我覺得香港畀好多機會唔同國籍嘅人，好簡單，就好似我個女咁，社會公平地對待佢，都畀佢考入中文大學讀醫科，收生過程冇歧視、冇偏幫本地人。」被問到對於近日南亞裔人士帶來的社會問題時，他表示：「其實亦有啲印巴好發奮、亦有啲賺大錢做經理。我嘅評語係，大家見到唔好嘅例子只係小部份。我忠告嗰啲愛生事嘅小部份南亞裔人士，其實大把機會啦，應該要發奮，建議佢哋改行正路。」
可否不分膚色的界限？請留意另外兩位印裔香港人 — 廣東話棟篤笑藝人Vivek，和旺角咖喱大王Hira在香港努力奮鬥的故事。
採訪：陳小芝
拍攝：馮峰、廖達燊