前特首曾蔭權愛養錦鯉，佢曾將錦鯉交香園圍錦鯉場照顧，不過因高鐵工程不斷抽走地下水，香園圍只餘下兩個細錦鯉池，村民唔可以再靠養錦鯉為生。公民黨郭家麒昨喺財委會上，多次追問地政總署，究竟有冇派人了解，但地政總署助理署長慕容漢講唔出幾時見過同會見受影響居民，又話手頭上冇資料，其後更硬射個波畀路政署同事補充。
不過路政署代表、副署長徐永華則疑因太多官員出席會議，竟被安排坐喺記者席，令主持會議嘅陳健波見佢唔到，一度問：「你（慕容漢）搵路政署邊位答，你要講邊個位佢坐邊度？」最終立法會職員喺記者席搵到徐永華，但佢竟然答:「我暫時對呢個議題冇乜補充。」激到郭家麒紮紮跳，大鬧政府係咪耍立法會，批評事件反映政府根本「亂晒籠」。