2013年喺旺角派傳單畀人打嘅Hira，今日由旺角轉戰蘭桂坊。
喺香港打拼25年嘅印度裔咖喱店老闆Hira話：「地圖上香港雖然好細，但喺我心目中，呢個地方，比世界更大。」
佢喺大學讀IT，20多年前來港後，最初喺灣仔一間餐廳打工，可惜逃唔過經濟轉差，後來被裁員。搵過IT嘅工作，可惜因為佢嘅膚色，過唔到最高層嗰關。最後，決定動用個人儲蓄，同埋向親友同銀行借錢，14年前喺佐敦開咗首間印度餐廳，4年前再响旺角開分店。太太做大廚，自己每日負責街頭派傳單。雨傘運動期間，試過生意好差，但係佢一樣無怨言。每日做17－18個鐘頭，冇幾耐仲喺蘭桂坊開多間酒吧。最近，蘭桂坊生意轉差，Hira就由旺角轉戰中環，喺酒吧門口落力叫賣。曾經擁有6個物業，被問到有冇說話勸喻其他同鄉，佢話，「喺香港，只要努力，就有回報！」。
重提三年前喺旺角街頭派傳單時被一名華裔男子叉頸襲擊，對方仲用英文「monkey」挑釁，涉嫌歧視，好彩途人幫手喝住惡男。今日娓娓道來，佢話「香港大部份都係好人，應該向好嘅方向諗！」Hira話歧視外地人嘅香港人唔多。
因為工作關係，Hira一直都無時間、無機會學好廣東話。但係sell客，絕對難唔到佢。餐牌每碟餸菜，英文、廣東話、普通話，甚至韓文都難佢唔到。成個訪問，佢講得最多嘅係：「Look at the bright side」。呢份樂觀同盼望，就係每個香港人動力嘅來源。
事實上，默默耕耘、跌低嚟過，呢份獅子山嘅拼搏精神，又有冇語言分界，又有冇膚色隔膜？有人話︰「只要擁抱香港價值、文化同制度嘅，就係香港人」。Hira嘅父母、兄弟、老婆、仔女依家都喺香港，一齊熱愛這片土地；你，又當唔當佢係香港人？
記得留意【可否不分膚色的界限系列】另外兩位印裔香港人，廣東話棟篤笑藝人Vivek，同埋內衣廠老闆劉子健太平山下嘅奮鬥故事。