一位讀者N來電郵談自殺，認為香港學生自殺不全然是個人與家庭的責任，教育制度也可能有問題。左丁山當然唔會否認呢一點，只不過係認為凡事總要自我檢討先，唔好隨便諉過於社會制度。
網頁Worldatlas.com有一篇文章講過去45年世界最高自殺率嘅國家，就係每十萬人之中有幾多人自殺。排第一嘅係佳亞那──Guyana有44.2名，第二係南韓28.9，第11名係印度21.1，第17名係日本18.5，俄羅斯排14，有19.5，總之前25名之中，以落後國家為多，東歐國家為次，亞洲最發達兩國家南韓與日本竟然名列其中，或可證明富裕程度與自殺無必然反比例關係。但日本與南韓係考試最大競爭性嘅國家，高考入大學係人生頂級大事，南韓高考之日，股市都要讓路，延遲一小時開市，避免交通擠塞導致學生入試場遲到，日本南韓自殺率高，與考試有關連，有研究顯示，南韓人由10至30歲，如果突然死亡，自殺係最大原因。
上星期左丁山在沙田馬會食飯，碰到一位榮休教授，社會學權威，於是捉住佢問社會學對自殺有乜研究，佢話社會學對自殺之研究百年以上，法國社會學大師Emile Durkheim（涂爾幹）在1897年已有一本經典名著出版，就叫做Suicide（自殺論），教授L話呢本書係所有社會學學生應該必讀嘅，自殺有三大類性：（一）利己的自殺（Egoistic Suicide）；（二）利他的自殺（Altruistic Suicide）；（三）失範的自殺（Anomic Suicide），跟住教授L一連串咁講落去，左丁山好似要上一堂社會學之自殺論，連忙閘住，問教授L：「社會學家有乜法子，防範學生自殺先？」教授L為之苦笑：「理論就有，但好多學生善於隱藏，佢地唔講，冇人會知，除非日夕相伴嘅家長，佢地如果細心啲觀察子女，或者會睇到一啲行為有異，但現代大學學生人數眾多，一班學生唔再係十幾人，而往往係百幾人，教授連學生名字都記唔清楚，依家啲學生亦極少主動搵教授做個friend，你同我讀中大時，新年會去老師屋企拜年，今天就好難有此情況。」咁又係嘅，21世紀嘅大學師生，同學與同學之間，十分疏離，見面不相識，幾難發揮守望相助嘅關係，一個例子係左丁山曾介紹兩位年青人相識，講講吓佢地先知道大學係中大同屆畢業嘅，在校三年未碰過頭，正因如此，家長特別要留意子女（不一定係干預），及時輔導。