又有豪門二代美女登場！亞洲富豪、香格里拉酒店創辦人郭鶴年的26歲細女郭燕光（Yen），正牌三高，靚女高學歷兼單身，不跟家族做地產，決心做start up，花了兩年創辦網上二手名牌網Guiltless.com，獲百億阿爸開口教路，她說：「阿爸講，做任何生意，先要想像自己係最奸嘅customer，知道點樣唔好俾人呃。」
撰文：林妙萍
郭鶴年細女郭燕光，日前首次正式受訪，講解自己的二手名牌網生意，着住Moschino裙、Givenchy高踭鞋的她，在開放寫字樓走來走去，親切爽朗，經常哈哈大笑，絕不似豪門千金：「細個時，爸爸講過，佢話嫲嫲唔想佢嘅孫女大個做香港小姐，唔係選美嗰種香港小姐，而係（唔做）名媛嗰種，所以媽咪捉得好緊，我哋由細到大都抱住呢個心態。」
千金小姐借衫着
26歲的太子女，不做家族生意，決心自己創業做網上二手名牌，四千呎showroom開在家族嘉里物業，一樣按尺計足租金。網站名為Guiltless.com，專賣名牌珍藏、二手衫，皆因自己經常上網買衫，亦發現商機無限，「呢個idea我哋籌備咗兩年左右，當初喺美國讀書，成日同朋友上網買嘢、喺宿舍forum互相借衫着，返到香港發覺地方細，啲衣櫃真係好細，你去生日party，影咗相、放上internet，同一條裙，最多可以着多一兩次，所以覺得係一個好大嘅商機。」
美國、歐洲的成功二手網站，上億元的生意額，亦令她有信心可以再做大，希望5月全球登陸，突圍之法是不做濫，而做精，Yen說：「我大學有做暑期工，美國第四年嘅full time job喺紐約做投資銀行，後來返香港，阿爸想我做房地產，我就做咗兩年，當時想將呢個做side project，但發覺真係需要好多時間，同埋要做得成功，要好大規模先得。」豪門背景當然亦是優勢，「我諗最大嘅優勢，係大家知我哋呢門生意唔係嚟呃錢，因為放咗自己個名上去，如果呃人哋錢，我蝕嘅、輸嘅嘢更大過你。」
以為從小買名牌，千金小姐練成精明眼，原來Yen小時候只有幾百元零用錢：「由細到大，家教幾嚴，完全冇零用錢，朋友嘅零用錢都多過我好多，我記得，一個星期好似一、二百蚊，買文具都要諗，我好記得，中學時好想要一部保麗萊，嘈咗好耐，媽咪都唔肯買俾我。所以𠵱家比較鍾意買嘢。」自認是購物狂的她，17歲收到人生第一件名牌衫，是由細哥買給她、價值2萬多元的Viktor & Rolf狐毛領大褸。夢想要夠大，Yen 3歲讀幼稚園時，更曾想做阿爸嘅老闆，外人眼中的郭鶴年非常嚴肅認真，90多歲依然日日返工，她眼中的爸爸對女兒仁慈兼「縱壞啲女」。
揀男友六呎優先
剛回復單身的Yen，富家美女一定多人追，為錢埋身的肯定都有，她坦言從小到大，學識睇人，她揀男友的策略是先保密自己家世，內在重要，Yen直認外形也都重要：「我不嬲比較鍾意亞洲人，外形上，起碼要高過我，我五呎六，高我少少啦，盡量五呎八、九，最多六呎啦，唔得都冇所謂，哈哈，盡量啦。」
攝影：陳志嵐
錄影：林德雄
【PROFILE】郭燕光（Yen）26歲
【家庭】
亞洲富豪郭鶴年幼女，上有三兄四姐，兄郭孔丞、郭孔演、郭孔華、姐郭惠光等。
【學歷】
女拔萃中學、史丹福大學國際關係系學士
【愛好】
時尚、有趣的事物、日本文化、行山及瑜伽