家陣做區議員，仲辛苦過做街坊保長，蛇齋餅糭固然不能少，地區服務更加要貼心到位，再單單係收街坊投訴、幫街坊搞搞申請政府服務、帶隊去見政府官員，已經不足以突圍，隨時仲會喺下屆區選俾對手打低，所以做區議員都要諗計，點樣推陳出新服務地區。好似民主黨區議員區諾軒噚日喺facebook轉貼咗張廁所門口相，仲有一串有佢個樣嘅鎖匙（圖），原來佢話呢樣係佢辦事處其中一項服務，就係借出鎖匙方便街坊去商場借廁所，而佢就喺匙扣加埋自己張相，街坊借咗鎖匙都認得議員個樣，識得還畀邊個議辦，真係用心良苦。