【旅遊籽】不要石屎　還我古道泥沙路

【旅遊籽：文化地標】
以前交通網絡落後，想買乜買物都要翻山越嶺，人們來回穿梭，漸漸行出一條條古道。中國有茶馬古道、日本有熊野古道、台灣有八通關古道，其實香港都有古道，不過大多湮沒。越野跑手曾小強（Stone）跑山十年，發覺山野間水泥路徑不斷增加，還伸延至古道，最近怒氣爆煲，發起fb關注小組望喚起社會關注。行山路，還是步步高低跌宕，偶爾動魄驚心，才有樂趣。

四百年前，未有青山公路、荃錦公路，荃灣與元朗之間隔住幾個山頭。荃灣鄉民想去元朗墟市購物、做生意或探親，都要翻山越嶺，假如元朗人戀上荃灣人，今天當然冇問題，但舊時卻是Long-D戀，少點腳骨力都冇資格跨區談情。路是人行出來的，鄉民在幽深山徑來回穿梭、運送貨物，走的人多了，山徑漸變成連接元朗及荃灣的交通要道，再演變成今天的元荃古道。香港有五十多條古道，因交通發展很多已湮沒，有的變成郊遊徑，如元荃古道大部份路段歸入大欖郊野公園。香港史學會總監鄧家宙博士指，四百年前，大概在明朝，荃灣仍是小村落，鄉民會前往元朗墟市出售農產品或購買日用品，古人普遍腳力好，可一日來回兩地。
慕名而至，未上山前以為古道古色古香，散發古裝武俠片氣息，但我最期待的畫面沒有出現，有三四百年歷史的元荃古道人工味濃，即時有點興致索然。有香港「山界第一人」之稱的越野跑手Stone都深有體會，他是全職救謢員，仍擠出時間每周跑五日山，有時間就去世界各地練習及挑戰越野跑比賽，以業餘性質參賽，卻獲得世界第八佳績。在林蔭之間身水身汗跑了十年，Stone發覺郊野漸多水泥山徑、水泥鑲石路、花崗岩路，明明該是自然地景，人工化的觸手卻無聲無息侵佔。本來都打算隻眼開隻眼閉，直至最近Stone在家附近山頭練跑，發現山徑都鋪成水泥混花崗岩路，怒氣即時爆煲，「我份人好怕同人嘈交，但當下好嬲怒，覺得要出聲。」他隨即在facebook開設「郊遊徑石屎化關注小組」，在跑山、做救謢員、湊仔之間擠出時間製作問卷、上電台做節目，牽頭喚起社會關注。

有香港「山界第一人」之稱的曾小強指，有得揀，一定揀跑泥沙路，行山還是希望能夠真正接觸到大自然。

拒絕水泥路　跑手跑出新泥路

元荃古道本來是Stone其中一條最鍾愛的山徑，從荃灣起點開始的一段上山路並非古道，但沿途村落小屋疏疏落落，農戶在家門前墾地耕作，飼養大堆看門狗，路旁還長了棵吊鐘花樹，頗有前人依山耕作的況味，意外有點古道氣息。到深入大欖郊野公園範圍，正式踏入古道，只見草堆間修葺了條新簇簇的水泥鑲花崗岩路，一直穿過石龍拱，伸延向田夫仔方向。石塊整整齊齊，古意即時蕩然無存，Stone回想，僅五年前，此路仍是碎石小徑。「我去外國練跑或者比賽，會覺得真係跑咗入大自然，當地郊野甚少會用水泥鋪設山徑，只取諸自然選用沙袋、木材、石頭等等，唔會混入水泥。」四圍比賽及練跑的他，認識很多外國越野跑手，「佢哋都好鍾意香港郊野，鍾意睇獨特嘅高樓林立景觀，又覺得接近城市好方便，但佢哋都好奇點解有咁多石屎山徑，跑落隻腳易痛，對膝頭又大負擔。」仔細留意，會見到石龍拱路段的水泥鑲石路旁邊，有條平行伸延的自然泥沙路。Stone解釋：「因為好多人唔鍾意行水泥鑲石路，寧願走泥沙路，所以側邊又多咗一條新路。我自己跑山嗰陣，都會特登跑泥沙路。」

影響生態　蠑螈河蟹過不了花崗岩路

個人認為，平心而論，花崗岩路也不是全無用處，的確較方便一家大細行走，Stone：「你以為水泥鑲石路好安全？其實只要落少少雨，路面就好濕滑，好易跣低，唔好忘記香港仲有十幾條極易行嘅家樂徑，何必要搞古道？」他並非完全反對建水泥路，「村落附近鋪建石屎路冇問題，始終要方便居民生活。」但入到郊野，就應當自然生態行先。綠色力量自然及科學總監鄭睦奇博士指，水泥鑲石路對生態有影響，尤其用花崗岩鋪設的路一般比周圍路面高，部份小動物未必能夠跨越，尤其是河澗生物如蠑螈、河蟹等。幾層花崗岩路面對牠們來講，是橫蠻的千里城牆。Stone指出，三年前曾有組織收集簽名反對鋪建水泥路面，收到政府回覆，指希望能「鼓勵更多遠足人士使用這些路徑」。Stone搖頭苦笑：「大家行山都係想感受大自然，遠離石屎森林一陣，點知又撞番石屎，避無可避。」贏到方便，但輸了古道。
整段元荃古道挑戰性不高，邊行邊拍照，三個半小時輕輕鬆鬆就行完。喜出望外是後段的南坑排頗有古意，還留有古舊的手砌石徑。沿途又經過伯公廟，即土地廟，鄧家宙指前人以山路通商，有機會遇上山賊，故在山路建廟宇求平安。他補充，古道無法用傳統方式保育，以元荃古道為例，本身無甚文物，道路又重新鋪整過，僅剩一些小廟古村。他認為最好的保育方法是留下路徑原有風物，讓市民可以親身體驗古道風貌，畢竟古道是古人自發行出來的，最好的保育是大家踏着古人的足迹繼續走，不論跑山還是郊遊。