本港老牌地產商之一、成立68年嘅協成行，業務已經逐步由第三代接棒，集團主席方潤華個孫方添輝（Jonathan）有份搞嘅中環荷李活道53至55號「木的地酒店」噚日正式開幕，仲同爸爸、集團董事總經理方文雄一齊亮相。
Jonathan現年27歲，早年負笈美國南加州大學（USC），2011年畢業後返香港，先喺投行打咗兩年工，之後加入協成行幫手負責工程部門，今年正式打理酒店業務。
呢間木的地酒店前身係寫字樓，兩年幾前開始動工改做酒店，用荷李活做主題，包括正門外牆一幅高達11米嘅荷李活巨星壁畫。
酒店入面有好多巨星收藏品，好似瑪麗蓮夢露簽名嘅高中班照、同埋NBA巨星米高佐敦嘅簽名相，大部份珍藏都係Jonathan從美國搜羅得來。
