香港打吡大賽向被視為本地馬壇至高榮譽，嚟緊星期日沙田馬場將舉行第139屆賽事，華人練馬師中只有簡炳墀曾五奪香港打吡冠軍，2001年最後一次稱冠後，就未有華人練馬師再獲此殊榮。不過，佢徒弟葉楚航（圖）今次有望成為15年來再度贏得呢場賽事嘅華人練馬師，葉楚航訓練嘅賽駒「小米周」實力不容小覷。
葉楚航成為練馬師已14年，共贏得580場頭馬，2012/13年馬季，以69場頭馬登上冠軍練馬師寶座，繼佢師父簡炳墀後，第二位奪此殊榮嘅華人，更有機會憑去年至今出賽5次奪3大獎嘅「小米周」、喺今次打吡再下一城，「今次係我第4次參加打吡大賽，但之前啲馬都係普普通通，冇乜期望，今次係畀咗18萬報名費幫『小米周』報名，輸就唔會畀呢筆錢」。「小米周」係10年來首匹未有長跑經驗，卻係越級挑戰打吡大賽嘅年輕賽駒，仲要抽到第一檔位，葉楚航對「小米周」甚有期望。