南華周三喺亞協盃分組賽作客馬茲亞先勝後敗，即晚坐夜機返港，噚日朝抵埗後個個都謝過謝賢，以為可以唞番日啦，點知高層因為嚟緊周日有場聯賽盃四強鬥標準流浪，所以冇得休息，即刻要開會檢討。
坐完通宵機開會「照肺」
近排頭頭碰着黑嘅南華，球員輪住做「十字軍」，高層諗住換走體能教練馬些路同主教練米路會有轉機，點知都以1:2敗走馬爾代夫，喺亞協盃G組三戰全敗包尾，出線渺茫。周三輸波後，南華高層原定即晚返港，第二日下午兩點半操練。不過，球員坐五個半鐘通宵機，到港大約係朝早八點幾，返到屋企都應該接近中午，要兩點半返南華會練波，即係冇得唞？所以，包括隊長陳偉豪在內嘅一眾少林兵即場為呢個安排起哄。教練列卡度為咗安撫球員，最後更改行程，有隨隊出征嘅球員改為六點返南華會開會，之後再到泳池做恢復訓練。
列卡度新官上任當然唔會偷懶，佢下晝都帶住陳肇麒等冇去馬爾代夫嘅球員操咗個幾鐘，為嚟緊聯賽盃鬥流浪做好準備。列卡度話：「南華要盡快反底，着得呢件南華波衫，球員就要負上呢個責任。」嘩，講到咁激昂，唔講都唔記得，你好似上個月仲係教緊流浪喎。
