【獨家試衫】𡃁妹漸變型格熟女stephy 10年時裝史【獨家試衫】𡃁妹漸變型格熟女stephy 10年時裝史
鄧麗欣（Stephy）同方力申（小方）今日中午時份突然透過公司太陽娛樂公佈「分訊」， 十年感情或者唔只佢哋心傷，睇住兩位由2007年《十分·愛》演到2015年《紀念日》嘅廣大觀眾，大概亦一樣百般滋味在心頭。
人生有幾多個十年？Stephy由入行時的學生妹到今年34歲的輕熟女，十年間的造型上都轉變不少。
2016年，宣傳電影《紀念日》，一身deep-V半露肩長裙騷腿，襯埋一頭半鬈短髮，好有女強人味道。（圖片來源：Stephy Instagram）
都係2016年，唔只carry到黑色，呢身Top Shop紅色喱士短裙亦俾佢著出半熟味。（圖片來源：Stephy Instagram）
2015年，剪去多年lady長髮，着上黑色Alice + Olivia入膊短裙，吸睛位在戴埋近期潮星至愛嘅APM Monaco首飾，去年大熱紅唇妝亦夠貼潮流。（圖片來源：Stephy Instagram）
2014年，出席電影《男人不可以窮》宣傳，雖然著上露趾platform高跟鞋同cut-out連身裙，但紮咗節結馬尾髮型，開始有氣質。
2013年同好姊妹Miki一齊主持節目，pastel粉紅色上衣加半截A-line裙非常青春，一頭斜蔭長髮亦係廣大男生至愛，睇嚟終於學識less is more。（圖片來源：Stephy Instagram）
2012年 gel前額one length頭加疑似皮草，幾年前著仲ok，換轉今年著Stephy真係食幾多年齋都水洗唔清。
2011年，粗冷彩藍色冷帽加粗織冷衫，反僕歸真Feel，重重的「從良」和ready做小方背後女人的味道。（圖片來源：Stephy Instagram）
2010年，加減乘除圖案上衣，襯大圈圈耳環同自然鬈長髮，2012年媽媽生時再著，Stephy果然夠慳夠環保。（圖片來源：Stephy Instagram）(PREPARING)
2009年，兩塊「餅碎」合照，Stephy齊蔭加鬈髮係當年唔少少女指定髮型。不過相信都幾難再見到佢着呢款小背心喇。（圖片來源：Stephy Tang/Facebook Page）
2008年，黑底白lace one piece意圖露出少少騷胸，加埋長曲髮同銅色妝本來女人味十足，可惜一對白色ankle boots就看出配搭功力尚未到家。
2007年，呢條銀白色連身裙唔講以為係底裙，加條粗belt同深藍密頭高踭鞋娘味十足，加埋少女瀏海長直髮同橙胭脂妝，年輕就是有本錢。
2006年，唔知一件頭定兩件頭的連身長衫已覺累贅，加多條超礙眼黑色打底legging是太小心，仲要有對同樣縐摺大大舊的灰白高筒boots同一條黑色十字架頸鏈，原來黑白配都有唔穩陣的時候。
記者：黃樂雯、容慧心