巫師喺周三迎戰公牛嘅NBA常規賽，憑控衞禾爾（John Wall）貢獻「大三元」29分12助攻10籃板，以117:96擊敗公牛，令東岸季後賽席位之爭嘅形勢更亂！禾爾火力全開，但就認為球隊防守同樣出色：「假如我哋可以保持最近兩場嘅水準，面對任何對手都有機會贏。」
今季東岸戰況混亂，好多隊都爭緊第七、八位，從而出戰季後賽，巫師𠵱家以32勝35負暫列第10，仲有希望㗎。至於輸波嘅公牛就以33勝33負排第九，今場傷癒復出、攻入16分嘅戴歷路斯（Derrick Rose）坦承要爭取出線季後賽嘅資格，需要面對唔少考驗；T吉遜（Taj Gibson）今場打得七分鐘就拉傷右腳，加素（Pau Gasol）因為右膝受傷，未來幾場肯定缺陣，令公牛內線兵源變得更少。