前晚（星期三）深夜，柯士甸道同漆咸道南交界夜闌人靜，八方路過嘅時候驚見一架相當巨型嘅車喺馬路上等緊紅燈，起初八方以為係泥頭車，點知睇真啲，嘩！咁大碌炮喺車頂嘅？原來係駐港解放軍嘅裝甲車（圖），仲唔係一架，係一隊，喺尖東街頭行駛，場面真係非常之咁壯觀。
不過呢隊裝甲車唔係一條隊咁行，而係逐架逐架分開行，所以唔少私家車都被夾咗喺中間。點解咁冇隊形？咪就係因為佢哋行得慢囉，啲裝甲車喺燈位起步，個速度實在慢到呢。不過除咗車隊之外，八方仲發現覺士道同柯士甸道一帶，有唔少短髮、便服、載耳機嘅人喺路上，似乎係駐港解放軍嘅人物喺度睇住啲裝甲車行進。至於啲裝甲車去邊，就不得而知喇。