仲有一年左右就係特首選舉，𠵱家表態挺特首梁振英嘅人買少見少，原因心照啦！身兼港區人大代表嘅新民黨田北辰（圖）昨於電台話，日前喺北京出席兩會期間，佢同中央講吓香港問題，直指係管治手法出事，點知觸動某啲人神經，搞到被人警告。唔知香港地仲有邊個方丈咁小器？
二少話佢同中央解釋，今時今日香港嘅問題唔係出自港府嘅立場或者施政理念，而係管治風格同手法嘅問題。雖然佢冇正面講撐唔撐梁振英連任，但再三強調自己係對事不對人，事關人係可以改嘅，點知就被人警告。二少有口德，冇講邊個警告佢，不過佢都話，內地官員講嘢好小心，冇透露北京對港府嘅意見。咁建制內仲有邊啲人會警告佢，真係呼之欲出。