由諧星薛夫洛根（Seth Rogan）、占士法蘭高（James Franco）同保羅活特（Paul Rudd）等紅星配音嘅新動畫《Sausage Party》預告片日前見街，呢部動畫以食物為主角，講述每種生活喺超級市場嘅食物每一日都好期待被人類揀中帶返屋企，認為係一種光榮。電影仲有愛情線，男主角腸仔Frank與熱狗包Brenda一見鍾情，認定對方係perfect match，就咁睇的確係一部老少咸宜、合家歡嘅動畫，咁諗你就錯了！
預告片去到1分鐘左右，一眾食物先發現現實嘅殘酷真相，腸仔見到薯仔被剝皮，芝士被磨碎同埋蘿蔔仔被人咬碎，佢哋先知驚，之後就設法將真相講俾其他食物知，又要逃避被人食嘅命運。
《Sausage Party》係由《史力加2》導演Conrad Vernon及Greg Tiernan執導，薛夫洛根有份編劇，係第一部R限制級嘅美國動畫(美國R限制級指17歲以下人士需要家長或監護人陪同收看)，旨在要反轉迪士尼及彼思動畫嘅概念。啱唔啱小朋友睇？家長要自己諗清楚喇。