呢排睇新聞真係少啲幽默感都唔得，偉大特首大談諸葛亮講英文笑話，台下嘉賓遲幾秒先識笑，不過有時扮笑都好過苦笑，「太監林」憑感覺通過高鐵撥款，香港又唔見成200億，等床位嘅就繼續等床位，等公屋嘅就繼續等公屋，高官成日話政府唔夠資源嘛。
大陸新聞同樣好笑，官媒話「習大大」係中國最後領導人，或者佢哋知道習大大千秋萬代咁統治中國，所以咪最後領導人囉。網購大王就喺公開場合講話，話如果自己間公司執咗，中國就可以冇晒假貨的話，咁簡單嘅事佢馬上就做。言下之意，呢個世界咁多賊，多佢一個唔多，所以大家唔好怪佢做賊嘞。
網購大王假假哋都有強國最偉大足球隊廣州恒大唔少股份，據聞呢支冠軍球隊最近喺強國新三板交易，換算市值已經超越曼聯，真係嚇死人。講真伊巴謙莫域（圖）要離開巴黎聖日耳門，最有資格同曼聯爭嘅，當然係呢支強國冠軍。伊巴話PSG要留佢，將巴黎鐵塔改做佢嘅銅像就OK；嗱，要搵真嘢就難啲，網購大王個王國中，要搵假嘢幾咁易，假英超假歐聯獎盃，一百幾十蚊人仔就有交易，伊巴要銅像之嘛，網購大王加埋佢個地產大王拍檔一聲令下，要起幾高就有幾高，不過幾時冧就唔擔保。
講真，伊巴年尾都35歲，去英超保持到狀態猶自可，搞唔掂衰收尾隨時俾人笑，做埋山寨王嘅佢，倒不如真係去山寨國踢波，等強國聯賽越炒越熱。
文：牽牛