谷草素來係華倉狩獵場，這晚頭兩場由李易達以「八運」及「海之濤」包辦頭馬，贏夠15Win達標。到第三場四班1200米，輪到姚本輝發威，佢將「永神駒」交畀新公司騎師巴西籍之姚力高一試，結果人馬即時擦出火花。
中年6歲馬「永神駒」直路沿內欄長驅直進，衝贏打開今季勝門，單Win及組合獨贏A3，分別派321及34.5元，「永神駒」同頭場柏寶勝出馬「八運」都係上仗包尾，而今場大翻身變第一名，姚力高客串到第五個賽日，首次在港首捷。
今場爆到七彩，大熱門「綫路神駒」沿途同「至尊飛星」鬥放互燒，結果兩敗俱傷，統統輸到離行離列，反為全場最冷三駒後上入三甲，頭馬「永神駒」32倍，「贏錢之道」64倍由黎海榮跑第二，「超強快駒」33倍配梁家俊跑第三，「星際武士」得第四；Ｑ派11,876元今季最冷，三重彩25萬，四重彩125萬幾。
姚本輝幽默地說，近日收到朋友WhatsApp，問他是否同姓三分親，所以安排姚力高騎「永神駒」。姚本輝回覆當然不是，只是有時一些搏極都唔出頭的馬，換上新騎師可能擦出火花，結果一如練者所料。姚本輝又補充「永神駒」早前試閘走勢不俗，比上仗輕身，也是進步原因。