佔地15萬8千平方米嘅消防及救護學院噚日揭幕，學院有526個宿位，為新入職同現職消防及救護屬員提供培訓，內有多項先進模擬訓練設施，提升人員喺處理涉及鐵路、隧道、船隻、飛機同燃料庫等事故嘅專業知識同救援技巧，同時有高空拯救、坍塌搜救同室內煙火特性嘅專業訓練設施。
學院開幕之時，亦係「都會緊急應變研討會」開幕禮，約250名14個國家同地區嘅消防及救護專業人員會參與研討會，就救援方法、滅火技術同緊急救護服務等交流。學院噚日邀請咗特首梁振英任主禮嘉賓，即場仲有模擬訓練示範，CY身後一度有熊熊烈火（圖），同佢政治實況差唔多！