當你最近發覺你的日程表出現嚴重嘅重叠情況，即唔單止「會接會」的情況，甚至成日「會叠會」，你可以點？既然咁日理萬機，你可以做的，係要去作出選擇。
而選擇的原則，當然係有各式各樣啦。例如，視乎個客㻇size大小、發展潛力、你出現與否所帶來的分別等。
剛剛過去嘅周末，一定係大好日子，我一共收到四張婚宴請帖。星期六、日就只得兩日，人就得一個。結果，我選擇去三個、推咗一個。而喺三個當中，星期六嗰個坐足全程，星期日就跑兩場。選擇過程，除咗睇吓同主人家嘅交情、仲要講心情。
以前落廣告，遇上有多過一個廣告客戶，想喺同一時段落廣告，選擇方法易到極，通常可以用更高價錢踢走競爭對手。電視、報章雜誌、戶外都一樣做法。
最近，唔知係咪市道真係咁差，前幾日揸車經過紅隧口，竟然見到其中兩塊平時理應非常搶手嘅巨型戶外廣告牌，竟然白雪雪乜都無。我仲記得，以前市道好，想要落呢兩塊廣告牌，閒閒哋要排6個月。今日竟然無人問津，實在太恐怖了！唔知係咪好似中、上環啲街舖業主一樣，寧願丟吉都誓死唔肯落價租出去。
只怕落咗價一次，以後就好難爬返上去。唔似地點偏遠一啲，如西隧、東隧嘅戶外廣告牌，遇到冇客，好多時都會減價促銷，或綑綁式用package price去連續幾塊一齊賣，務求製造更大的震撼力云云。
15分鐘開三個電話會議
又說回我爆咗嘅日程表，我有日真係忍唔住問我秘書，本來wall to wall嘅日程我已經唔夠時間去廁所、坐的士去開會無預塞車、甚至要等咁啱有人遲到才有幸食半個飯盒。如今仲會叠會，15分鐘搭一程車由銅鑼灣落中環都安排咗3個電話會議，我真係死都唔得掂……
秘書小姐不慌不忙咁答我：「我已經彈走咗好多人㗎啦，唔係你一日工作48小時都唔夠用！」停了一下繼續講：「會叠會有個好處，你可以用呢個作為最佳藉口，想唔開或早走都容易啲，當佢哋book你時間嗰陣，我都已經提醒咗佢哋啦！」啊！原來係咁，一心畀我擁有更大嘅自主去選擇，滴汗。
文廸晞
mailto:[email protected]