伊巴謙莫域（圖）係呢排球壇其中一個至紅人物，幫咗巴黎聖日耳門拎法甲，仲口出狂言話，除非換咗個巴黎鐵塔做佢嘅銅像，否則佢季尾都會離隊。伊巴嘅狂妄，喺初出道嗰陣都幾乞人憎，但隨住佢越踢越勁，外界就開始覺得佢寸得起，由狂妄變咗做狂傲，成件事正面晒。
佢嘅花名「呂布」都一樣，以前啲人寸佢成日轉會，話佢係「三姓家奴」呂布，點知家陣呢個花名就變成形容佢嘅霸氣，將呂布由負面變成正面，簡直連古人呂布都沾咗佢光，仲帶挈佢老友麥士維做埋赤兔馬。點解麥士維係赤兔？成日黐住呂布搵食嘅，仲唔係赤兔咩。
其實，伊巴嘅人生亦係一個由負面走向正面嘅故事，佢出身移民家庭，爸爸係嚟自波斯尼亞嘅穆斯林；喺當時，伊巴就好似𠵱家唔少歐洲人眼中嘅敍利亞難民一樣。但家陣，伊巴由非我族類嘅移民之子，變成瑞典英雄。
最近，歐洲掀起反移民潮，例如喺德國嘅州議會選舉中，右翼主義抬頭。不過，如果德國冇勇於收留難民，今日就冇慕遜加柏中場達侯特呢個新星。20歲嘅達侯特喺敍利亞出世，10個月大就跟家人走難嚟德國，𠵱家係球隊正選，今季聯賽入咗四球，仲入選過德國小國腳。
伊巴離開巴黎之後做咩好？作為體壇其中一位最成功嘅移民後代，伊巴可以同達侯特等作為榜樣，緩解歐洲人同難民之間嘅矛盾。當成個球壇致力去協助難民時，小弟覺得移民後代出身嘅伊巴可以喺呢方面貢獻更多。
文：咖喱