工聯會兩個榮譽會長陳婉嫻同鄭耀棠近日為一男子開火，話說嫻姐日前接受傳媒訪問時，批評特首梁振英剛愎自用，嘩，一男子係本港著名嘅方丈，棠哥唔知係咪怕株連？嗱嗱臨喺傳媒訪問中話呀，嫻姐不代表工聯會，兩個加埋過百歲嘅人過招，點知又殺出個工聯會前副會長梁富華，佢發聲明力撐棠哥講得好。
呢場工聯會元老級批鬥戰，日日精采，作為工聯會立法會議員嘅黃國健，似乎都食住花生睇呢場大戰，佢仲叫八方唔使咁緊張，皆因陳、鄭二人過去時不時都會咁，唔使人做和事老，佢哋會拆得掂。至於梁富華，佢話對方係不甘寂寞加句嘴箒，笑言：「幾個老人家更年期症候群發作」，笑稱佢哋應該幫襯工聯會嘅潘佩璆。潘佩璆係乜水？佢係老人精神科嘅醫生嚟㗎噃！