初為人父嘅工聯會立法會議員郭偉強心情非常唔錯，最近BB仔滿十二朝，噚日佢跟足傳統喺立法會大派豬腳薑，仲要係相當之有名嘅中華總商會出品，唔係用雞蛋而係用鴨蛋整，味道相當之唔錯。郭偉強買咗5煲，兩煲請議員同事食，一煲請助理食，另外兩煲就用架車仔，喺立法會好似小販咁推出嚟請傳媒食（圖）。
雖然BB已經滿十二朝，但郭偉強仍然為改名一事頭痕。既然姓郭，不如叫郭靖啦！郭偉強當然話好，但佢話太太唔多鍾意，都係鍾意三個字嘅名，所以都係聽老婆大人話。佢仲話今次有去陪產，見證太太經歷十級痛苦，真係明白到做媽媽嘅偉大。