區議會選舉過咗3個幾月，但有議員仲未搵到辦事處。民主黨新任北區區議員、天平東選區嘅劉其烽本來申請上任區議員租用嘅辦事處，點知房署通知話要抽籤，而現時有4位本身已有辦事處嘅民建聯議員齊齊申請「圍攻」，意欲甚明。劉其烽話，房署未有盡力提供協助，竟然叫佢可以喺區內垃圾站嘅一角，改建為議員辦事處。
劉其烽話，房署咁做明顯係刁難佢，「要居民去垃圾站搵議員」，做法唔合理，侮辱佢同該區選民。劉其烽仲話，有關垃圾站位於上水安盛苑對出，為鐵皮頂，附近積滿一袋袋垃圾，房署承認如果要改建，單位嘅水電、結構都要「睇過晒」，先知係咪可行，劉其烽質疑工程完成時，佢嘅任期都可能完結，𠵱家都唔知點算好咯！