長建（1038）與電能（006）舊年底合併失敗，長建仲俾電能小股東揶揄為「窮書生睇上千金小姐」，認真冇陰功。雖然主理呢單刁嘅「小超人」李澤鉅一直冇公開回應，但細心閱讀長建份業績報告，不難發現李公子仍有一絲怨氣。
長建噚日公佈業績，業績報告提到電能嘅時候，講番舊年公司向電能提出合併建議，「擬創立一家市值約2,500億元的大型基建公司」，可惜單刁最終告吹。望望噚日電能市值係1,610億元，長建似係話，電能小股東如果舊年肯制，𠵱家持有嘅公司市值就唔係呢個數喇。
去到最尾部份，長建又話嘞，展望未來，無論現有或新增收購方面，公司都睇到「龐大的持續發展機遇」，再次話畀電能小股東知，佢哋可能走寶。