一直關注保育大象嘅環團野生救援（Wildaid）最近發現，本港有至少7間酒店出售象牙製品，包括酒店業龍頭半島酒店，但半島酒店眼明手快，喺野生救援上周日於facebook專頁貼文指佢哋售賣象牙製品後翌日，隨即公佈有關商戶已經停售象牙。
八方都巡過其他酒店，發現尖沙嘴嘅富豪九龍酒店都有一間舖頭賣象牙製品，店主仲喺櫥窗貼上已絕種嘅長毛象資料，hard sell自己嘅商品，價錢由幾百至幾千都有。
野生救援話，因為貿易不斷，本港現時最多只有6公噸象牙存貨，懷疑唔少非法貿易象牙都係透過合法象牙買賣掩飾，靜雞雞流出市面，令到捕殺大象持續，強調大象已面臨絕種危機，呼籲本港酒店管理層停售象牙製品，免令血腥貿易禁之不絕。