湖人周二迎戰帝王嘅常規賽，喺當家球星拜恩（Kobe Bryant）因右肩酸痛而缺陣嘅情況下，以98:106輸畀帝王；今次亦係湖人自1948/49球季以來，首次喺單季對帝王錄得四戰全敗嘅劣績。
湖人新秀榜眼D羅素（D'Angelo Russell）最近雖然有唔少進步，但佢喺今場射入14分都難阻球隊輸波；唔知佢輸波後，會唔會搵女友陪佢一齊練吓波呢？美國傳媒《TMZ》報道，𠵱家同D羅素拍緊拖嘅妮姬（Niki Withers），雖然係南加洲大學排球隊嘅成員，但佢喺籃球場上嘅表現應該都好出色！咪睇妮姬得5呎10吋高，但原來佢嘅彈跳力相當驚人，因為佢未用盡全力起跳，就可以輕鬆咁單手掹住籃框，《TMZ》仲講笑話，妮姬勁到可以去WNBA嘅洛杉磯火花隊試訓，其實湖人戰績咁差，去試訓都有得諗。
湖人同帝王喺2000年代可謂一對宿敵，名宿奧尼爾（Shaquille O'Neal）甚至試過口出狂言，寸帝王實力太差，應該改隊名叫「皇后」。帝王今場贏波，係48/49以來首次喺單季橫掃湖人，都算得上係一雪前恥。