【本報訊】重組後的長和（001，重組前稱長實）將在今日公佈2015年業績，市場料盈利無甚增長，但憧憬「超人」李嘉誠會繼續在海外併購，加動集團持續增長。歐曾投資董事曾淵滄是長和的長情股東，他持有股份29年，表明「一股都未沽過」，原因是信任主席李嘉誠。「李嘉誠長期是香港首富，咁跟住首富買股票，唔會錯架嘛」。曾淵滄稱，此舉就如美國有許多人，會跟隨「股神」巴菲特買股票一樣。
長實在87股災後，股價一度由10多元跌至5元，而股災前更提出每股10元供股計劃。曾淵滄指出，李嘉誠當年身體力行以10元供股，未有理會當時股價已跌穿供股價，故相信他的眼光。當時他在5元水平於場上買入，但沒有供股，股價亦沒有再跌，「李嘉誠出10元，我出5元，咁我平過李嘉誠一半，點解唔買呢」？
曾淵滄持貨多年，中間經歷過多次股市、經濟等周期波動，但每次待股災出現時，長和股價跌得較低後，就一路增持。「97金融風暴，我放咗好多股票，但冇放過長實出去」。他相信長和是很好企業，即使短期業績不濟，例如受到油價拖累、零售放緩等因素，影響企業盈利表現，但只是短期問題。
信任李嘉誠管理能力
他認為長和是經過股災後，一定會回升，甚至創新高的一類股票，但亦表明不會在高位追貨。至於李嘉誠一旦淡出，曾淵滄仍然睇好長和，原因是李嘉誠已為公司找來全港最叻的精英去管理。
另一由72年長實上市持貨至今的長情股東、中潤證券主席蔡陳葆心指，大市已無股票可揀，會繼續揸貨等該公司主席李嘉誠幫佢賺錢。除非李嘉誠退下來才再考慮去向，她坦言，作為李嘉誠長子的長和副主席李澤鉅，未必有爸爸的智慧。
長和重組遷冊及重心歐移為市場關注，揸足長和數十年的蔡太對此表現平淡，皆因覺得李嘉誠又叻又有運，「咁多年來上上落落，你有無聽過李嘉誠唔掂？最多話佢係富豪榜跌咗幾個位」。
蔡太指，只要長和系股份仍在本港掛牌就有信心，亦信任李嘉誠的投資眼光及經驗，不介意對方重心歐移，因「如果外國仲賺多啲，佢咪又幫你賺多啲」！加上李嘉誠「用人叻，不是用自己腦，而是用叻人幫佢。你諗佢地咁叻都唔會錯得去邊，會信賴佢地」。
她指自己已將長和系當基金投資，因為相信以李嘉誠今時今日的地位名譽，不會任由股份亂來，損毀自己聲譽。只要李嘉誠「自己揸弗（主理）嘅股就可以長揸」，料長和今年派息亦不會令市場太失望。至於未來長建（1038）電能（006）再提合併亦表示歡迎。
有指長和系的世紀重組乃為第二代接班舖路，作為李嘉誠粉絲的蔡太卻清晰表明「退下來就要睇情形，因為佢始終係一個總指揮來，你（團隊）叻都要佢落Order（指令）」。
她坦言仔仔（李澤鉅）接班後「好難講」，因雖是「親生嘅、學咗啲東西，但未必似你（李嘉誠）一樣或青出於藍」。加上以往因有李嘉誠督促，李澤鉅「無辦法亦要跟你走，你又有權、有勢又叻，都唔可以逆老豆意，但佢嘅智慧有無爸爸咁高，就值得諗下」。