打工仔見到盈健醫療（1419）招股，應該有份莫名嘅親切感，事關佢為唔少企業提供團體醫療卡，有乜頭暈身㷫時，可以去醫生度轉個圈，若然撞見靚女姑娘，就更加醒神。
相請不如偶遇，噚日招股記者會，盈健特登請嚟三位真．護士坐鎮，連埋人體器官道具，十足十幾年前喺香港舉辦過嘅人體奧妙展！
可能𠵱家各行各業嘅新股太多，想投資者一眼就分到呢間公司做邊行，管理層出盡法寶。呢間公司做醫療診所嘅，咪搵護士同埋攞晒人體器官出來囉。
不過噚日幾位董事就比較怕醜，唔肯拎住啲眼球、腦、心臟影相，話公司係做醫療服務而唔係生產呢啲道具喎。講開又講，呢間公司又係夫妻檔，首席醫務總監兼執董彭麗嫦醫生係主席陳健平太太。