馬刺喺同日另一場，以108:87擊敗快艇，將主場跨季連勝紀錄延續至42場；真路比利（Manu Ginobili）大讚攻入20分嘅尼納特（Kawhi Leonard、中）係球隊嘅贏波功臣。據美國《體育畫報》透露，尼納特完全唔似聯盟中嘅大牌球星咁奢華，佢喺上年夏天以五年9,400萬美元（約7.3億港幣）頂薪續約後依然慳家，至今都仲揸緊1997年嘅Chevy Tahoe汽車，作風同馬刺一樣咁低調。而喺今仗攞到六分嘅中鋒鄧肯（Tim Duncan），職業生涯得分累積到26,399分，喺NBA得分榜上以四分之差，力壓塞爾特人名宿哈夫里切（John Havlicek）升上第14位。
